ADHURIM
Nga thellesia e ngrohtë e tokës Plot jetë Ofroj tulipanë, dafodillë të artë e luledielli, Lule manjola dhe kamelia rozë, Si dhe lule jasemini plot aromë. Nga qielli i hapur blu Rrezatues plot jetë Ofroj re që ndryshojnë vazhdimisht, Perëndime shumëngjyrëshe dhe nuanca mëngjesi. Zogj që përkëdhelin flladin; Çafka, qifte dhe shqiponja. Nga ujërat e freskët e të pastër Tejpamës plot jetë Ofroj reflektime malesh, Qetësi hyjnore e valëzime dallgësh. Peshq që notojnë dhe bilbila që sodisin. Për ata që meritojnë lëvdata e respekt Ofroj gjithë bukuritë e natyrës. Ju lutem pranojini ato nga unë.
TË KËRKOSH SHPËTIM
Unë kërkoj shpëtim tek të gjithë Budat dhe Bodisatvat. I hapur ndaj mençurisë dhe dhembshurisë së tyre E kthej jetën time drejt influencës së tyre. E kthej zemrën time drejt dashamirësisë së tyre. E kthej mendjen time drejt udhëzimit të tyre. Çdo ditë dhe çdo orë Le të kujtohem ti sjell ata ndërmend, Dhe të hyj në këtë botë Me ata krah meje. Çdo ditë dhe çdo orë Le të kujtohem se dëshiroj të jem Një prej fëmijëve të Budës Dhe të veproj si i tillë, Me Tre Stolitë gjithmonë në zemrën time.
RRËFIM
Pasi ende nuk jam një bodisatva i përkryer Me keqardhje kam lënduar veten e të tjerët. Tek të gjithë Budat dhe mësuesit e mi Rrëfej çdo paaftësi të trupit, të fjalës dhe të mendjes. Ashtu si gjethet e vjeshtes që shtrihen Përreth kembëve të lisit të madh Ashtu edhe injoranca e karmës sime, Dhe pasojat e veprimeve të mia mbi veten e të tjerët, Le të bien tek këmbët e Budës. Le të mësoj nga gabimet e mia, E t'i lë vend bëmave të mençura Të lulëzojnë, duke lënë pas Të gjithë paaftësitë e mia, Ashtu si në Pranverë zënë zanafillë Lulet e bimët e reja Le të pranohet kjo thirrje nga mësuesit e mi, E të qëndroj unë i palëkundur dhe i vërtetë Në dëshirën time për të ndryshuar, Në dëshirën time në të mirë të të tjerëve Dhe në dëshirën time për të kuptuar të Vërtetën.
MIRËNJOHJE
Me dashuri dhe respekt Ndaj Atyre qe janë Zgjuar prej të cilëve unë mësoj I përulem me mirënjohe Dhe i falenderoj për bekimet e Darmës, Që ata më kanë transmetuar. Për përpjekjet dhe vendosmërinë E treguar nga Budat dhe Bodisatvat Dhe të gjithë mësuesit e së shkuarës dhe të tashmes I përulem me vlerësim. Pa besimin e tyre ku do të isha unë tani? Duke iu gëzuar meritave të tyre Dhe duke i kënduar lavdërime, Plot gëzim nga kënaqësia e fatit tim të mirë I përulem me falenderim Dhe i gëzoj kaq shumë mirësie në këtë botë. Mirënjohja ime është përmbytëse. Si thellësitë e shumë oqeaneve, Si lartësitë e madhërishme të maleve, Si hapësirat e pamata të shkretëtirës Si bukuria e pasur dhe e dendur e pyjeve, Le të qëndrojë e fortë dhe e bollshme Dashuria dhe respekti im për mësuesit Edhe në kohë vështirësish. Herë pas here krenaria dhe frika ime nuk më lejojnë Të gëzohem për arritjet e të tjerëve Në botëkuptimin e tyre më të madh, Dhe përkujdesin e konsideratën që kanë treguar për mua. Duke vënë mënjanë pasiguritë e mia I përulem me mirënjohje të madhe. Le ta pranojnë urimin tim të ndjerë falenderues Të gjtihë Budat, Bodisatvat Dhe mësuesit e mi.
KËRKESË
Me hijeshi dhe nderim u kërkoj mësuesve, Ju lutem, vazhdoni t’ia ofroni dhuratën e Darmës Kësaj bote me vuajtje dhe deluzione. Përkrah vëllezërve dhe motrave të mia në Sanga Unë lutem që Budat dhe Bodisatvat Do të mbeten me ne të gjithë, Dhe do të ndajnë botëkuptimin e dashamirësinë e tyre Që të gjitha qeniet të mund të përjetojnë Qetësinë e një zemre të paqtë.
TRANSFERIMI I MERITAVE
Le të jenë të gjitha veprimet e mia pozitive Të trupit, fjalës dhe mendjes, Ato të së shkuarës, ato të këtij momenti Dhe ato të së ardhmes, Ndihmë në zbutjen e vuajtjes dhe trishtimit të kësaj bote. Duke dhuruar të gjitha meritat që kam grumbulluar Le të ndihmoj të gjitha qeniet të ndiejnë gëzim, dashamirësi dhe paqe. Le të jenë veprimet e mia Ndihmë për ata që janë vetëm, të gjejnë miqësi, Ndihmë për ata që kanë frikë, të ndihen të sigurtë, Ndihmë për ata që kanë urrejtje, të ndiejnë dashamirësi, Ndihmë për ata që janë të sëmurë, të jenë mirë. Gjithçka që bëj u tejçohet të tjerëve, Pra, le të përfitojnë ata nga sjellja ime Dhe mendimet e mia. Sadopak që ndiej se mund të bëj Le të jetë nga dashamirësia dhe nga besimi, Nga integriteti dhe nga vetëdija. Le të jetë praktika ime e bujarisë dhe etikës, Durimit, entuziazmit dhe meditimit e mbushur me mençurinë e Tatagatave. Le të jetojë shpirti i Bodisatvave përmes meje Dhe të prekë të gjitha qeniet sado afër apo larg, Qoftë të njohura apo të panjohura, E të ndihmojë në krijimin e një botë më paqësore.